हंस अकेला

रस्त्यावर वळणे येती? वळणाशी रस्ता येतो?
एकटे एकटेपण ये, की मीच एकटा येतो?

पाऊस उन्हाचा वैरी, छायेचा आश्रित मीही
दारावर म्हणून माझ्या पाऊस सारखा येतो?

ही भिंत हवी की खिडकी - आतून पाहण्यासाठी?
भिंतीत चिरावी खिडकी; खिडकीतुन वारा येतो!

आरशात दुकटा दिसतो, डोळ्यांत एकटा असतो
प्रतिमेच्या डोळ्यांमध्ये हा कुठून ऐना येतो?

प्रश्नाला उत्तर मिळता ती जोडी दो हंसांची
एकटाच उडून जाण्या हा हंस एकला येतो